政情：郭位情迷數學 自爆畫畫唔掂
每個人都有長處同短處，唔會有人樣樣嘢都叻晒嘅。就好似城大校長郭位早前出席城大舉辦嘅《達文西：藝術與科學‧過去與現在》展覽開幕禮時，被問到畫畫叻唔叻時，佢就不斷話「不行的」，自己細個讀書時，美術科好差，雖然合格，亦並非好低分，但都唔係最好，當時數學係最好，笑指「Da Vinci（達文西）數學那邊跟我有點像，另一邊他比較厲害」。
覺得數學係「很美的東西」
郭位講起，覺得數學好奧妙，係「很美的東西」，學生寫論文時，佢都同學生講有一個好重要嘅地方，就係結果一定要簡單，「偉大的結果，最後都是很簡單的，這是上帝的奇妙」。
有啲人話，擅長數學嘅人諗嘢嘅方式都同其他人不一樣，佢都話有可能，但不論學啲乜嘢都會有特別技能，好似音樂家同藝術家咁，喺自己嘅範疇都會有自己嘅特點咁話。