政情：竊賊盜珍藏 李樂詩心痛
極地探險家李樂詩，四十幾年前已立志周遊列國。過去出門遠遊唔單止要準備外幣，佢亦會攜帶旅行支票以防萬一。佢話以前信用卡未有依家咁普及，好多人喺起程之前會買定幾張旅行支票，然後去到當地銀行兌現，又或者直接當現金使用，若然遇上盜竊或遺失，亦可獲得補發，算係安全系數相當高嘅旅遊支付工具。
年輕人眼中 旅行支票已過時
不過隨住科技發展，訂機位搵住宿都電子化之餘，可供遊客選擇嘅支付方式亦愈嚟愈多， 旅行支票喺遊客心目中嘅地位大不如前。李樂詩話依家喺好多年輕人眼中，旅行支票就同菲林一樣，都係不合時宜嘅過氣之物。
雖然旅行支票不敵時代嘅洪流，但李樂詩話用剩嘅旅行支票同外幣，佢都會好好收藏。然而有一次住宅遭賊人爆竊，偷去佢多年以嚟嘅珍藏，儘管係好唔開心，但佢後來想到失去嘅珍藏終究都係身外物，從而學懂釋懷。