政情：用錯渠道 只識說教 委員鬧爆 高官腦閉塞 唔知青年諗乜

林琳叫官員走出去 搵啱Channel溝通

林琳話唔係所有青年都想創業，亦唔係所有人都想去內地工作，質疑依家講去內地發展，係咪真係有好多青年支持，其實好多青年人只係想簡簡單單喺香港開咖啡店，或者喺香港做一份簡單嘅工作，甚至想留喺香港做獸醫等等，覺得香港急需一個大規模嘅就業或創業調查，官員同委員們都要走出去，喺青年人用緊嘅平台去同佢哋溝通，搵出佢哋真正嘅諗法，而且青發會上任一年後嘅落區速度，根本未能切合需要，需要加強工作。

佢又話，有好多人話後生仔唔上進，好多長輩就用說教式嘅講法，叫啲後生仔要愛惜香港、要有國家情懷，搞到後生仔一聽到都即刻收埋隻耳仔，「隔音濾音」，質疑點解唔用啲啱年輕人Channel嘅手法去推廣，例如好多年輕人鍾意日本文化，就應該推廣「職人精神」入面嘅專注、集中、盡責等等，換個方式宣傳，質疑政府點解唔轉轉腦袋呢？

對於去內地工作，佢話青年人最擔心係咪方便、醫療係咪可靠、去內地創業同就業可以住喺邊、開銀行戶口等等問題，但依家政府就冇統一有效嘅答案，搞到大家都非常迷惘，認為政府應該即刻開始長期做就業同創業調查，掌握民情，協助制訂措施方案等。

空有資源唔識用 一成不變得把口

林琳接受查詢時就鬧爆政府喺青年就業同創業方面，力度同深度都做得唔夠，羅致光同劉江華等問責官員根本唔了解年輕人嘅需要，成個社會已經唔同咗，但係政府嘅處事手法仲係一成不變，認為政府應該長期就年輕人嘅就業同創業需要去做調查，好似股市咁，有長期資料，啲調查唔可以三個月就完，批評政府有好多資源，但根本冇用到去做好件事。

講真嗰句，依家社會怨氣咁大，政府成日話要做好青年工作，如果仲係咁一成不變，當交吓功課就算，啲政府官員真係得把口講，hea到爆啦！