中環出更：沈豪傑譴責暴力 變舌戰網民
香港示威浪潮停不了，十八區幾乎無一幸免，其中元朗區更屢次成為焦點，區內火藥味十足。元朗區議會主席沈豪傑日前喺網上就近日區內示威出聲明，點知演變為舌戰，將戰線蔓延到網上。
沈豪傑喺Facebook上批評示威者再次去到元朗集會同示威，搞到西鐵同輕鐵服務都被迫暫停，除咗毀壞財物、堵路外，更對路過市民施襲同濫用私刑，對於呢啲違法行為予以嚴厲譴責咁話。
叫支持暴徒嘅人走
網民見到紛紛踩場留言，有人問佢譴責咗七二一白衣人衝入西鐵站打人事件未，又問點解投反對票，佢就回應翌日已譴責，自己無反對叫對方Fact check。另外更有人講到「主席喎，收工啦」，沈豪傑亦隨即落逐客令回敬，留言話支持暴徒就唔好入去佢嘅專頁，道不同不相為謀喎。
不過，件事點會咁易就完結，呢番言論又畀人批評為滅聲，作為區議員都容不下相反聲音，結果沈豪傑先再話政府有錯都唔代表示威者可以用暴力，有良知都應該要反暴力喎。好彩對方都係講道理之人，認為沈豪傑肯講出論點嘗試以理服人，之後兩個就理性交流意見，包括討論成立獨立調查委員會喇！
卓妮