中環出更：辦長者婚禮3年 楊莉姍：希望延續落去
為勞碌大半生嘅長者留低甜蜜嘅回憶，搞「長者婚禮」係一個好主意。卓妮日前喺九龍東區各界聯會嘅晚宴上見到首席常務副會長楊莉姍，佢講起為百對長者舉辦愛嘅見證儀式同免費拍攝婚紗照活動，仲話已連續舉行咗三年，每年都有一百對「新人」喺主題公園舉辦婚禮，好開心可以幫區內長者完成願望，希望可以一直延續落去咁話喎。
副會長徐珊雯就話以前影婚相好貴，老一輩人無機會、無條件可以影西禮服，依家有資源就幫吓佢哋。問佢當年又有冇影婚紗照，佢就話梗係有喇，仲話喺「芝柏婚紗」影咗幾次添，事關先生唔識影相，由頭到尾表情僵硬，唧都唔笑，揀唔到靚相，連累到佢又要影多輯。
見到老人家開心 方俊宏眼濕濕
常務副會長方俊宏同太太都有到場，方俊宏話喺長者婚禮見到老人家咁開心，作為公眾真係會感動到眼濕濕，佢又話通常後生結婚先會宣誓，依家一齊生活咗咁多年再宣誓，會有好多愛情回憶，係好特別嘅一件事。講起佢同太太結婚就嚟八年，雖然當時都興去唔同國家影婚照，但始終都揀咗喺香港一啲歷史建築物度影，因為佢哋係喺呢度認識。佢好鍾意打冰球，仲訂咗成個溜冰場影婚照，但係方太就抱怨話自己當時着住高踭鞋，非常混亂喎！
轉頭見到楊莉姍嘅爸爸、香港中華廠商聯合會永遠名譽會長楊孫西、九龍東區各界聯會會長李誌峰、觀塘區議會主席陳振彬同廣東社團總會永遠榮譽主席王國強。問陳振彬點睇最近社會事件，佢就話依家問題就係資訊科技太發達，資訊太多，分辨唔到邊啲真邊啲假，政府係平台構建方面要努力，等真確資訊畀市民知道。佢又提到九龍東人傑地靈，商業區發展快，最緊要香港和諧，九龍東就一定會更好咁話喎！
卓妮