東網瀏覽破八億 傲人佳績靠賞識

有人話:你喺中環大叫一聲,七八十人聽到,可能冇人回頭望你一眼,皆因香港人生活節奏太快。但如果功夫茶話畀大家知,東方報業集團網站《on.cc東網》,近三個月來嘅瀏覽量由四億五千七百幾萬,火箭飆升至八億三千五百萬,升幅逾八成,係咪證明香港人生活節奏幾快都好,好嘢梗有人望完又望呀?

各位街坊,賣花不必讚花香,王婆賣瓜亦不必自賣自誇!有麝自然香,瀏覽量及手機應用程式下載量冇得造假。冇嘢o架,好嘢自然多人欣賞,功夫茶在此向捧場嘅讀者衷心講聲多謝!我哋係唔會因為瀏覽量破八億而驕傲!相反,本着專業精神,必更努力,同時更加貼緊時局,謹守崗位,精益求精!

嗱,功夫茶睇過一則軼事。話說有人登上一座高山,見到涼亭上有幅楹聯:「到此已窮千里目,何須更上一層樓。」好明顯,寫此對聯嘅人好滿足現狀,眼睛自然唔想睇得更遠。據悉清朝時有人改之:「到此已窮千里目,誰知才上一層樓。」幅對聯改咗三粒字,境界即刻唔同晒!功夫茶只係想講,《on.cc東網》仝人絕不會因為瀏覽量勁升、APP下載量激增六倍而有絲毫自滿,反之,仝人將懷着謙虛心情,深知要再上層樓,除咗更努力,也必須投放更多資源,當然,更有賴各位讀者不斷嘅鞭策同埋支持!

時局動盪,政府無能,止暴制亂淪為空談,警民衝突持續升溫,社會撕裂益見嚴重,而東網正是哪裏有事發生,即時往哪裏去,俗語云「兵貴神速」,採訪新聞何嘗不然?呢一方面,東網永遠快人一步,永遠無間斷緊貼現場,功夫茶深信呢個正正係得到讀者厚愛嘅原因。胡適說:「天下沒有白費的努力」,東網仝人必更努力登高上層樓,永不言倦,做足一百零一分!

好嘢唔怕一講再講,提提大家,本月二十五日《東網新聞台》強勢出擊、華麗登場!「東網正點新聞」由經驗豐富嘅專業主播為大家報道本港、兩岸同埋國際重點新聞,每小時更新,務求為讀者提供快靚正資訊同埋宏觀角度,咁就唔怕「袖手乾坤看日斜」,時時留意住天下大小事,增廣見聞,梗係冇蝕底喇!

再講啊,香港步入衰世,妖言惑眾之歪論邪說特別多,之不過衰世仍有清流,各位街坊,多啲入嚟收睇《東網新聞台》嘅王牌評論節目啦!政府施政點廢柴、無良政客點無恥、漢奸契弟點禍港,聽得多高人鞭辟入裏、一針見血嘅評論,日子有功,功夫茶包保你觸覺變得敏銳,唔會「矮人看戲何曾見,都是隨人說短長」!