反修例嘅行動持續，醫護人員都有發起喺醫院集會表達不滿，但有團體尋日就到醫院管理局抗議，指醫護人員戴晒口罩同頭盔集會，違反專業操守，將白色恐怖帶入醫院，對病人亦唔好，要求醫管局嚴懲甚或解僱嗰啲醫護人員。話時話，醫護人員強調無論係乜嘢人都會救，但佢哋亦有表達意見嘅權利，究竟點樣去處理，真係好考醫管局主席梁智仁嘅政治智慧嘞！
