政情：天然人造鑽石難分辨 李偉材：要用精密儀器
非天然嘅珠寶玉石，往往都被奢侈品市場視為價值唔高嘅「朱義盛」。但隨着消費觀念嘅改變，人造鑽石近年亦躋身為首飾業嘅寵兒。香港珠寶製造業廠商會副主席李偉材話時下嘅消費不但要講求價格親民，亦好在乎商品嘅生產過程會否破壞環境，而合乎呢兩個要求嘅人造鑽石，自然會受到買家嘅青睞。
唔使開採 人工鑽受青睞
早前喺一個活動上見到李偉材同品牌總商會理事陳惠檳。講開鑽石，李偉材話鑽石除咗用來做首飾，工業上亦有其用途，所以美國同前蘇聯呢兩個工業大國幾十年前就不斷研發同改進人造鑽石嘅技術，令到品質日漸提升，今日若非精密儀器根本無法鑑定是否屬於天然鑽石。
佢又話天然鑽石嘅形成過程需數以億年計，但人造鑽石憑機器只消幾日就完成，加上省卻人工開採，避免砍伐林木開礦挖掘，因此論產品成本同環境代價，人造鑽石都符合性價比同綠色消費嘅原則。
至於天然鑽石會唔會無人問津呢？佢話未必，因為當購買鑽石作為定情信物嘅話，獨一無二嘅天然鑽石始終都係最理想嘅選擇。