政情：丈夫88歲生日會 孖鄭明明勁舞
有「美容教母」之稱嘅鄭明明日前為丈夫陳樹德搞咗個生日會，兩夫婦仲喺台上跳舞，跳得好開心。原來佢哋都係跳得之人，仲好合拍，雖然丈夫已經八十八歲，但跳得相當有勁度，鄭明明仲大讚丈夫跳得好有型。
結婚48年 互相遷就
結婚四十幾年，有乜相處之道呢？明明姐話最重要係互相遷就，好似喺食嘢方面，佢係食辣嘅，但丈夫就唔食，所以出街用膳嗌嘅餸菜都會有辣有唔辣。佢又講咗件有趣嘅事，話佢鍾意食榴槤，丈夫就覺得好臭唔食，於是有日趁丈夫唔喺屋企，佢就食咗榴槤，點知丈夫一開門，就聞到陣味，即刻掉頭走，好耐都冇返嚟，原來丈夫係要等啲榴槤味冇晒先入屋。
明明姐又話自己性格比較急躁，但丈夫就好有規律嘅，有時急躁起嚟難免會同丈夫頂撞，嗰時丈夫都會唔出聲，好包容佢。
問到陳樹德生日點解唔大搞？明明姐話丈夫今次都係家人圍內食就算，等到九十歲先大搞喎。咦！今年係佢哋結婚四十八周年，兩年後咪係金婚，唔通想生日同金婚一齊搞？