政情：帶港隊參賽貝鈞奇睇奧運唔使買飛
下年就係東京奧運，全球都想撲飛去睇，熱門賽事真係一票難求。講起睇唔睇奧運，港協暨奧委會副會長貝鈞奇就笑指「我使乜買啫！」梗係啦，佢要帶港隊上去參賽o架嘛！
唔講唔知，原來佢都唔一定可以睇晒想睇嘅賽事o架！佢話最緊要都係要睇港隊有份嘅賽事，例如單車、跳馬、游泳、劍擊等，好期待睇李慧詩同石偉雄等參與嘅賽事，至於國家隊嘅賽事都希望有機會睇到啦，例如跳水係國家隊強項，一定好精彩，不過都唔一定睇到，因為要視乎國家隊嘅比賽會唔會同港隊有份嘅賽事撞賽期，尤其港隊冇參與跳水，總之睇港隊嘅賽事一定係排第一，因為自己有責任去支持咁話。
運動員開始集訓 保持狀態
佢又講起，港隊出到線嘅已經開始集訓，希望今年有好成績，仲大讚港隊運動員都好乖，賽前都會保持狀態，食嘢又會自動自覺節制，教練都會睇住佢哋嘅身體情況嘅。