阿健是一名資訊科技公司的員工，最近工作時經常烏眉瞌睡，上司阿康便向他了解一下。阿康問：「阿健，上星期初交畀你份文件搞掂未？」阿健一臉茫然回答道：「咩文件？啊……依家即刻去搞。」阿康擔心問道：「最近你好似冇咩精神，做嘢效率又低咗，究竟咩事？」阿健回答：「唉，近排成日都失眠。等我去沖杯咖啡提提神先。」
阿康說：「就嚟放工喇喎，咁晏仲飲咖啡，會擾亂你睡眠。睇嚟你嘅『睡眠衞生』都好差。」阿健反問：「咩『睡眠衞生』？我每晚臨瞓前都有沖涼喎。」阿康解釋：「你搞錯啦！『睡眠衞生』（Sleep Hygiene）係指良好嘅睡眠習慣，例如瞓覺前四至六小時唔好飲含咖啡因或酒精飲品，保持睡眠規律養成固定嘅瞓覺同起床時間。臨瞓前唔好食得太飽亦唔好太餓，睡前卅分鐘避免使用電子產品等。」
阿健疑惑：「吓，手機都唔用得？我晚晚瞓唔着都會玩吓手機，覆吓訊息。」阿康再解釋：「好多電子產品喺使用時都會產生藍光，而藍光會抑制褪黑激素分泌，會令人失去睡意。」阿健嘆氣：「唉，一瞓唔着就眼光光咁望住啲時間一秒一秒咁過。」
阿康說：「我建議你最好將有報時功能嘅裝置放喺自己睇唔到嘅地方，因為愈睇愈有壓力，反而更加難入睡。如果喺床上廿分鐘都瞓唔着，不妨離開睡房，做啲嘢輕鬆吓，好似聽吓柔和嘅音樂，等有睡意先返上床瞓。謹記要令身體尊重同明白床只係用嚟瞓覺嘅！」
職業安全健康局
www.oshc.org.hk