政情：公民講場：張建宗寫網誌救火 加碼派糖大隻講？

政府話要解決社會深層次矛盾，早前推出近二百億元嘅紓困措施，但救唔到火，反修例嘅行動仍然持續，仲愈爆愈大。政務司司長張建宗尋日寫網誌話依家社會形勢複雜多變，重申政府會加緊推行即時奏效嘅改善民生政策措施。老實講，之前話派嗰近二百億元嘅糖，都要等立法會十月開波批嘅，依家連開唔開到都成問題，唔知幾時先落到市民個袋，張建宗仲話隨時可以加碼派糖，真係大隻講。