政情：八網難逃：退休環遊世界 梁栢賢又後生咗
醫院管理局前行政總裁梁栢賢（PY）退休後都好少公開露面，事隔個半月，近日竟然現身東京，原來佢去咗當地嘅新打卡勝地teamLab Borderless。
去東京打卡勝地 「置身波濤」
PY喺七月底退休，之前曾經講過退休後會環遊世界，果然係坐言起行。佢日前喺Facebook上載咗短片，見佢企咗喺度，而海浪就不停咁映上佢身上，恍如置身波濤之中，而睇佢嘅笑容都真係好enjoy。呢段片冇聲o架，唔知係咪想話一切盡在不言中抑或係無聲勝有聲呢？
唔少網友睇到呢段短片都紛紛留言，話「感覺好輕飄飄」、「踏浪而來」，有網友仲有啲寓意咁話「乘風破浪之後，旅途愉快」，另有網友就讚佢又年輕咗同神采飛揚添！
PY去打卡嘅teamLab Borderless美術館喺舊年六月開幕，館內嘅電腦同投映機，令人置身喺一個純數位世界當中，仲會喺唔同嘅展示場面互動。