中環出更：彭耀佳與老婆度中秋 撐完枱腳煮飯仔
喺啱啱過咗嘅中秋節，唔少政商界人士都選擇留港消費，包括香港旅遊發展局主席彭耀佳。卓妮日前晏晝三點鐘左右，撞到彭耀佳同太太喺置地廣場一間餐廳下午茶「撐枱腳」，期間有講有笑，食咗大約九個字度，兩人埋單離開。
正當諗緊彭耀佳兩公婆係咪去附近嘅名店Shopping，原來喺去附近嘅太子大廈超市買餸，準備夜晚有朋友上屋企食飯。卓妮上前打招呼，彭耀佳話佢最近同太太外遊返嚟，由於仔女都喺外國讀書嘅緣故，所以中秋節都係同太太過。
胡楚南一家燒烤過節
隔咗冇耐，四點幾就喺ifc遇見香港潮州商會會董胡楚南，佢話同屋企人趁假期共享天倫樂，朝早睇完戲、食完晏之後就去咗電話舖睇手機同時裝店睇衫，二仔、新抱同孫女入咗電話舖同時裝店睇嘢，佢就一個人喺門外睇手機，周不時入去時裝店畀意見。佢話中秋節正日一家人喺屋企露台燒烤，食乜都無所謂，最緊要開心。
到黃昏時候，立法會議員郭偉強一家三口喺ifc超市蒲頭，佢哋開頭睇熟食，不過就睇唔啱，於是轉去麵包舖買麵包，郭偉強問三歲半嘅囝囝鍾意食乜嘢麵包，睇咗一陣就買咗兩個麵包，原來係即買即食，郭偉強仲踎低餵囝囝食麵包，場面非常溫馨。
郭偉強又話嗰朝早喺灣仔出席一個嘉年華會，晏晝見無乜地方去就行ifc，返屋企放低囝囝之後就要連走兩場，去北角同柴灣舉行嘅晚會。
問佢中秋節點慶祝？佢話都係一家三口自己食，而為咗避開人潮，會等到下星期先同爸爸媽媽食飯。至於有無去旅行輕鬆吓，佢話呢段時間氣氛唔好，早排就算放暑假都去唔到，佢希望到聖誕節會得閒啲，陪屋企人去外地散心玩吓咁話。
卓妮