政情：蔣麗芸綁顏色帶為欄杆急救
示威遊行持續，部分示威拆毀馬路邊嘅欄杆用嚟作路障，搞到好多地方都冇晒圍欄，得番碌支柱。立法會議員蔣麗芸（Ann）近日就連同深水埗區議員劉佩玉幫手做啲「急救措施」，拎啲顏色帶綁喺欄杆上，等路人容易辨認馬路邊，唔好搞到過馬路時冇晒方向亂咁衝。
驚市民唔覺意仆出馬路
阿Ann喺社交平台上傳咗段影片，話依家深水埗區冇咗欄杆好唔方便，市民會唔知邊度可以過馬路而亂咁衝，條街咁多車，好容易發生意外。佢仲話，深水埗區本來就好多長者，馬路邊有啲位置仲有半個石級，依家冇咗欄杆，夜晚一個唔覺意，好容易因為睇唔到搞到仆出馬路，相當危險。
雖然阿Ann落手落腳喺深水埗區啲欄杆綁顏色帶，但佢話唔係一個長遠嘅辦法，所以最後都呼籲政府快啲維修好啲欄杆，保障市民安全。