政情：無飲管運動見效 陳晴撐零包裝買賣
好多環保團體批評超級市場過度包裝，製造咗好多垃圾出嚟。香港海洋公園保育基金主席陳晴就呼籲大家要減少用塑膠同飲管，仲話希望商界致力推動「零包裝」添！
陳晴喺七月去咗新加坡出席經濟學人Feeding the Future亞洲峰會，佢話即棄塑膠食品包裝係常見嘅海洋垃圾，每年有八百萬噸流入海洋，而全球至少有八百種物種受海洋垃圾影響添！所以佢呼籲全球社會要立即改變生活習慣，由源頭減廢，業界同政府更應該採取實際行動推動可持續嘅消費模式。
24%港人停用飲管
佢話商界應該幫手改變消費者嘅習慣，好似有商店就致力推廣「零垃圾」同「零包裝」嘅購物體驗，又話要推動減塑文化，要加強教育市民，而基金發起嘅無飲管運動推出咗兩年，香港有好多食肆、學校同公司都參加咗，根據今年進行嘅調查，有百分之二十四嘅香港人已經停止用飲管嘞！