中環出更：文化節呈獻獅劇 趙式慶帶埋大頭佛登場
講起「大頭佛」，好多人就會聯想起煩惱二字。但喺文化層面而言，舞獅欠缺大頭佛，其實係一種損失。熱衷中華文化嘅香港文化節創辦人趙式慶，尋日就喺記者會上宣布今年嘅香港文化節，將會首度向大眾呈獻已經式微嘅「獅劇」，屆時大家久違嘅大頭佛，又有出場嘅機會喇！
到底乜嘢係「獅劇」呢？趙式慶話流行南獅嘅農村會透過舞獅，嚟演繹傳統民間故事，咁就為之獅劇。佢話獅劇嘅表演形式豐富，既會攙雜中樂、武術同兵器等元素，亦經常聯同大頭佛一齊演出，但獅劇演出時須大量人手，喺環境狹窄嘅城市好難搵到合適場地。
王無邪憂後生仔同傳統割裂
香港中華傳統文化藝術基金會創會主席譚定邦話作為瑞獸嘅獅子，本來就係極之威猛嘅萬獸之王，但喺大頭佛所揮舞嘅葵扇下，就好似遇上馴獸師嘅皮鞭咁，乖乖充當佛祖身邊嘅護法。佢話喺實際演出當中，大頭佛既以詼諧身手示人，亦不時為視野受限嘅獅頭作出提示，所以大頭佛相當重要，只有資深嘅武術中人至可以勝任。
今屆嘅香港文化節會同南韓等國家有文化交流，著名畫家王無邪早前就到訪南韓濟州島，發現當地年輕一輩紛紛揚棄漢字，以致同傳統割裂。佢話時下嘅香港學生多數唔識文言文，雖懂得漢字亦難以閱讀古籍，同南韓人一樣遇到同傳統割裂嘅可能。
同場仲見到香港手套業商會會長林曉盈同康樂及文化事務署總監（非物質文化遺產）梁潔玲。林曉盈認為南韓人都有居安思危嘅意識，事事追求完美之餘，對自我嘅要求亦好嚴格，因此韓風得到普遍受落並非無因。
卓妮