早上，小剛在公司大堂看見小柔，便上前和她打招呼。小剛問：「早晨小柔，最近成個半星期都唔見你返工，你係唔係請咗假去旅行呀？」小柔回答：「我之前係就係請咗假，不過就唔係去旅行，而係請咗病假休息呢。」小剛驚訝：「病假？發生咗咩事呢？」小柔回應：「我之前患咗手足口病，要在家中休息呢。」
小剛疑惑：「手足口病？唔係小朋友先會有？」小柔解釋：「其實手足口病係一種常見於兒童嘅疾病，通常由腸病毒引起。成年人抵抗力差時，都有機會中招，所以大家真係要多加小心。」小剛再問：「呢個病個名就聽得多，病徵係會發喺手足口嗎？」
小柔解釋道：「除咗口腔可能會出現疼痛嘅水泡，手掌及腳掌有時會出現帶有小水泡嘅紅疹。除此之外，病發初期通常會發燒、食欲不振、疲倦及喉嚨痛。呢個病主要透過接觸患者嘅鼻或喉嚨分泌物、唾液、穿破嘅水泡或糞便，或觸摸受污染嘅物件而傳播。大部分患者病徵輕微，並於七至十日內自行痊愈。」小剛關心問：「嘩，咁你依家好番啲未？」
小柔道：「好番晒啦，如果唔係我依家都唔會返到嚟同你傾偈啦。仲有就係，記住要預防手足口病，要記住保持良好個人衞生，經常保持雙手清潔，打噴嚏或咳嗽時應用紙巾遮住口鼻。而且要保持良好環境衞生，經常清潔及消毒常接觸嘅表面，咁做就可以降低中招嘅機會。」小剛答：「明白。咁你都要多加注意同埋好好休息呢。」小柔回應道：「好呀。」
職業安全健康局
www.oshc.org.hk