政情：公民講場：房屋問題一大籮 黃偉綸有排煩

香港市民買樓難，又要捱貴租，輪候公屋又唔知等到幾時先有樓，對於房屋問題，政府一直冇解決辦法。尋日有政黨針對房屋問題，建議政府採用《收回土地條例》，收地興建公屋，亦有團體提出全面收回粉嶺高爾夫球場興建公營房屋，樣樣都衝住發展局局長黃偉綸而來。政府之前提出「明日大嶼」填海計劃已經引起極大爭議，仲被批評為倒錢落海，有關研究嘅撥款係咪可以喺立法會通過都係未知數，依家再嚟多條《收回土地條例》，真係唔知好定壞，睇嚟黃今次都有排頭痕喇。