政情：今日你上鏡：萬字夾掛胸前 梁定邦響應反暴力

近日有人發起「萬字夾行動」，話若果反對暴力同破壞嘅話，就喺身上掛上一個萬字夾以明志。獨立監察警方處理投訴委員會主席梁定邦尋日出席一個論壇時，胸前都掛有一個萬字夾。佢就話，周一（9日）晚上同十多位朋友食飯，席間大家都覺得「沉默嘅大眾」雖然冇發言權，但都要做一啲舉動，以表達對暴力同破壞嘅厭惡，於是香港嘅萬字夾行動就由此而起。佢又解釋，萬字夾行動嘅發源地其實係二次世界大戰期間嘅挪威，話說當時嘅挪威民眾因不滿納粹德國入侵，於是就喺衣服掛上萬字夾，因為萬字夾可以將散落嘅紙張合成一體，成為團結嘅象徵。