政情：遊台染腸胃炎 林青懶理照「掃街」
香港福建三明聯會青委會副主任林青（Erica）最近去咗台北公幹。台灣多美食，鍾意食嘢嘅Erica自然唔會放過呢個大快朵頤嘅機會。點知佢第一日食完晚飯就中招，腸胃炎導致佢又屙又嘔，認真陰功。不過幾日後見佢喺社交網站放咗好多地道台菜佳餚嘅相，又同一位靚女盡情掃街頭美食，唔通咁快好番晒？
Erica笑笑口話，其實仲未完全好番，因為佢聽講如果有腸胃炎，最好唔好食藥撳住啲細菌，所以佢冇食藥，只係食嘢小心啲，例如唔敢食佢最鍾意嘅日本料理，只食熟食。不過今次只係去四日，眼見就嚟要返港，於是臨走前就去「血拼」，唔止去試米芝蓮級數嘅傳統台菜，有位靚女好友仲特登揸車帶佢去基隆夜市「掃街」，幫襯咗三檔百年老店小食添。
籌備緊開醫療中心
Erica話，今次去台灣好倉促，因為佢籌備緊喺香港開一間關注大眾健康嘅醫療中心，咁啱知道有機會去台灣參觀幹細胞基地，所以急急起行。唔知係咪因為休息得唔夠，加上天時熱，所以病倒喇。