政情：傳政府封鎖VPN 莫乃光勸唔好咁蠢
近排社會氣氛緊張，網上仲有傳政府將封鎖VPN，資訊科技界立法會議員莫乃光(Charles)當然都好關注件事，仲話政府如果封鎖VPN就真係蠢喇。佢又提到自己都收到唔少朋友向佢查詢件事係咪真，佢就澄清話係假嘅，因為有關網站稍後已經用「收到相異情報」為理由，移除咗有關報道。
唔排除係個別事件
Charles尋日喺社交網站解釋，一般嚟講，封鎖VPN需要所有互聯網供應商（ISP）一齊合作，但未見到本地ISP有咩舉動，加上其他用戶用嘅各大小VPN網絡運作正常，唔排除之前報道嘅事故係個別事件，因基於網絡保安原因，個別VPN可能會被ISP或雲端服務供應商暫時封閉，呢啲都屬可能會出現嘅情況。
話雖如此，Charles就話唔代表大家唔使關注呢件事，仲話佢會繼續奉勸政府唔好咁做。佢又提醒市民，為咗自己嘅網絡安全，應該根據需要選用適當嘅VPN服務，保障自己網絡安全同私隱。