中環出更：民望低賴死唔走 鄭若驊無視亂局去交流
律政司司長鄭若驊民望持續包尾，最新民調其評分又創新低。不過佢尋日出席一個論壇時，就講到自己去咗邊度開會，做過啲乜，好似好威咁，但一畀人問到民望低嘅問題時就唔正面回應。鄭出咗名係「避政司司長」，香港最近亂局都係佢唔去立法會開會為政府解畫所致。如果佢有做嘢，就唔使搞到今日咁嘅局面。難怪社會各界包括學者都叫佢檢討吓喇。
學者斥不分輕重唔稱職
鄭喺論壇中提到自己上月中至今開咗兩個國際司法會議，又同法律界人士去上海、深圳同海南島交流。至於唔少市民關注嘅緊急法，佢只係話政府會就依家情況研究有需要用到嘅法律，又話用緊急法有好多考慮因素，所以未決定是否適用。對被問到其民望咁低點算，佢就唔肯正面回應。
香港理工大學專業及持續教育學院講師陳偉強就批評鄭避重就輕，唔識分輕重，明明依家香港亂到咁，都冇去解決，仲要離開香港走去外地開會，質疑呢啲交流同香港依家嘅危急情況有咩關係。陳又話，鄭作為一個問責官員，應該為自己低到咁嘅民望檢討同回應，直斥鄭真係好唔稱職。講到去咁多地方開會，好似做好多嘢咁，其實如果佢有做嘢，就唔使搞到今日咁嘅局面喇。
卓妮