中環出更：太空番茄鮮紅飽滿 董吳玲玲開心到似小朋友
每到暑假都會有唔少學生交流團到外地參觀，早前香港善德基金會（基金會）主席董吳玲玲就同咗一百多名中學生去北京同西安參觀考察，期間喺一個太空種子基地參觀時，就見到色彩鮮艷、令人垂涎欲滴嘅番茄，開心到好似小朋友咁。佢仲話，當時嘅氣氛令佢諗起小時候嘅田園生活喎。
話說基金會早前主辦「善德關愛科研青年發展計劃——中國航天之旅」，帶咗一百多名中學生去北京同西安參觀，擔任隨團榮譽顧問嘅就有教育局前局長吳克儉、保安局前局長黎棟國同董吳玲玲。董太笑笑口話，當時大家見到太空種子培育基地種出嚟嘅番茄顏色鮮艷，粒粒飽滿，覺得好靚，所以都忍唔住烏低身去聞一聞啲番茄。吳克儉就話，食落去一定好好味，仲張開口作狀想食咗佢，三人好似小朋友咁，玩得好開心。
鄭穩偉同後生仔充分溝通
今次考察團仲去咗西安參觀時間博物館及航天動力技術研究院，期間同學有機會認識液體火箭發動機及固體火箭發動機嘅理論，同時了解呢方面嘅技術喺民生方面嘅用途。一班同學仲動手製作火箭模型兼親手發射，既好玩又富教育意義，十分難得。
基金會永遠名譽會長鄭穩偉同常務副主席藍國慶都係今次考察團嘅聯席團長，同行仲有基金會靚女總理鄒圳麗同楊雅斯等。鄭話，今次已經係第五屆舉辦航天之旅，旅途中可以同後生仔充分溝通，了解年輕人諗法，覺得好有意義。而早前舉行個人攝影展為基金會籌款嘅攝影愛好者黃溢洋都有隨團擔任義務攝影師，佢原本性格比較內向寡言，但今次行程都令佢大開眼界，讚嘆不虛此行。
卓妮