政情：公民講場：固定小販牌大減 助基層就業淪空談

香港不時都因為小販相關政策鬧出好多爭議事，好似食環署近日公布，將本身交還牌照嘅小販攤檔同其他空置攤位，編配做四百三十五個固定小販攤位，再簽發新牌照畀人申請。不過有關注團體就批評，重新編配嘅攤檔比原本少咗六成，而食環署去年嘅調查明明顯示逾二千五百人有興趣申請，又批評新牌照未有涵蓋基層地區添。講真嗰句，新牌照數目明顯供不應求，覆蓋地點又唔夠多，政府成日都話要幫助基層，其實小販都係基層就業嘅一條出路，但食物及衞生局局長陳肇始對於小販牌照、墟市政策，一直都唔肯諗多啲方法，睇嚟幫助基層都只係口號而已。