政情：立會目標十月復會 黃定光最關注買保險
立法會大樓自七一起遭受兩次大型衝擊，搞到殘破不堪，都唔知可唔可以喺十月復會。立法會行政管理委員會委員黃定光（象哥）尋日出席一個活動時，形容立法會依家嚴重「內傷」，但目標都係十月復會，佢關注係保險問題喎！點解咁講呢？
需獲消防批許可證
象哥話，消防系統本來就好繁複，經歷兩次衝擊之後，立法會大樓嘅消防系統損毀嚴重，亦要增設滅火筒，依家最大嘅問題就係要消防處批出許可證，如果唔批，立法會就買唔到保險，再有咩「冬瓜豆腐」都好大劑。
被問到會唔會趕唔切開會，搞到要轉場復會，象哥就話「有可能但好困難」，因為會議要有電視轉播同即時翻譯，其他場地都好難搞到，再加上要考慮保安問題，開會又要點人數，仲講笑話轉咗場地嘅話，點名時要好似中學生咁大聲報到，實在太困難啦！