政情：區諾軒議席危危乎 劉慧卿約食飯打氣
受選舉呈請案件影響，立法會議員區諾軒早前被裁定不妥當當選，議席隨時危危乎。立法會前議員、民主黨前主席劉慧卿（卿姐）尋日都喺Facebook同佢打氣，祝佢工作順利，原來卿姐回覆指，尋日特登約區食飯，因為覺得對方近期嘅工作並唔係咁順利，所以就關心吓佢，「等佢知道卿姐支持佢」！
屬民主黨前黨友
其實區以前都係民主黨成員，不過已經退出咗一段時間，唔知係咪因為係前黨友，所以卿姐特登關心吓佢呢？卿姐話，二人相識一場，知道對方嘅情況之後，就決定要同佢打打氣。至於區就話餐飯都係閒聊居多，主要係卿姐好關心佢呢單關於選舉呈請嘅案件。
卿姐話，雖然區好多問題要面對，不過覺得佢狀態幾好，幾時都咁生猛。區解釋其實自己就冇乜擔唔擔心，事關覺得呢啲問題遲早都要處理，都係平常心面對就得嘞。