政情：讚不絕口 周錦威打算馬國買樓
香港近來掀起一股移民潮，而馬來西亞亦乘勢推出「第二家園」計劃，香港五金商業總會理事長周錦威，亦有意到馬來西亞置業，到底彼邦嘅樓巿有何吸引力呢？
周錦威話打算到馬國買樓，緣起係響五金商業總會嘅外訪活動中，結識到馬來西亞嘅拿督，而對方見識過香港嘅居住環境後就大皺眉頭，並同佢推介話，香港買個「豆腐膶」嘅價錢，足以響吉隆坡享受豪宅嘅居住空間，而香港豪宅天文數字嘅售價，去到馬國隨時可變土皇帝！況且當地華人眾多，粵語同普通話都通用，而悠閒嘅生活節奏，營商成本低廉兼且有相當嘅巿場潛力，論宜居程度應該勝過唔少東南亞國家咁話。
話當地受惠中國工業遷移
不過，周錦威都知道，馬來西亞仍有其不足之處，譬如政府嘅清廉程度，就惹人詬病；而基建設施，亦有改進餘地，但佢認為，中國工業移往東南亞諸國已成趨勢，預料馬來西亞亦可從中得益，相信現時於馬國購買物業，應該會有唔錯嘅升值空間喎。