政情：示威掛鈎免費性愛 羅范言論惹火捱轟
香港近月因應《逃犯條例》修訂出現多場示威衝突，幾乎每場示威都見到年輕人身影，或者因而令人覺得有其他原因先令佢哋如此投入。行政會議成員羅范椒芬尋日就聲稱有證據證明示威者有誘因上前線，因為年輕女性受誤導，而向示威者提供免費性愛，結果被同場嘅社民連主席吳文遠就即場叫羅范拎出證據，羅范仲被好多網民怒斥同翻舊帳，認真攞架嚟丟，證明說話真係唔可以亂講呀！
羅范與吳文遠一齊接受英文電台訪問，點知羅范語出驚人，直言有少女為前線示威者提供免費性愛，重申有證據係真有其事，對於年輕女性因為受到誤導而提供免費性愛感到悲傷喎。唔通身為行會成員嘅佢掌握到特別資訊，證明示威者以爭取訴求為名，實為滿足性慾，所以可以毋須理會佢哋嘅訴求？
話事主係朋友個朋友個14歲女
有聽眾打去怒斥羅范椒芬所講嘅係謠言，認為言論過火，就算真有其事都係個別事件，就連主持人都幫拖，重提羅范既然講過有證據，要佢解畫喇。羅范就話事主係朋友個朋友嘅十四歲女兒，所講嘅係二手資料，但強調係千真萬確，佢都睇過相關電郵，最後更發晦氣話信就信、唔信就唔信喎。
同場嘅吳文遠就反駁，話示威者唔使冒住催淚彈同子彈去換取性服務，仲即場叫羅范拎出證據。而吳喺節目後於Facebook發文講感受，直言畀羅范激到跳掣，仲燒埋其他官員同建制派身上，話好多人接受英文訪問時更加放肆，似乎羅范估唔到今次訪問會有人聽，先敢口出狂言囉。
網民翻教統局舊帳 斥思想污穢
有網民就事件留言，質疑羅范嘅證據係咪佢把口，又建議佢說話前先用腦，批評今次完美示範何謂「腦殘」，言論不負責任。另外，過去多年口碑欠佳嘅羅范更被翻舊帳，遭人大數佢過往出任教育統籌局局長嘅「往績」，話佢呢類人搞過教育真係可悲，亦都反映其思想同心地污穢喎。
行會成員負責為向特首出謀獻策，但羅范嘅言論同普通師奶無分別，以訛傳訛講到似層層，連基本分析能力都欠奉，如此質素嘅行會成員對政府幾有幫助，相信大家心中有數。行會中有呢類成員幫忙獻計，難怪修例會演變成前所未見嘅亂象，如果一日唔改變添新氣象，怕且香港亂象永無休止囉！