中環出更：梁偉浩：太空人只戴機械錶
人類探索宇宙需動用好多新科技，譬如太空人嘅食物，就同地面嘅菜餚好唔同；而太空人戴嘅手錶，亦非地面上嘅精密時計可比。香港表廠商會名譽會長梁偉浩話，佢旗下嘅公司就於去年十一月開始，同中國航天合作研製太空人嘅手錶。咁到底太空人，係戴電子錶還是機械錶呢？梁偉浩話電子錶只能夠喺一定嘅溫度範圍內運作，而太空嘅環境非常極端，因此太空人嘅手錶，必定係機械錶咁話。
梁偉浩日前出席國貨公司嘅「中華國表展」，場內都有陳列中國人自主研製嘅太空人手錶。梁話，地球大氣層以外嘅氣溫，可以低至攝氏負一百二十度，但電子錶於負四十五度就會停止運作，所以作為太空人嘅時計，就需要機械式操作，而製錶材料亦要採用氟橡膠、鈦合金同碳纖維等特別材質，潤滑油亦係特別配方，以防低溫凝結阻礙手錶機件運行。佢話中國係繼瑞士、日本同俄羅斯以外，另一有能力製造太空時計嘅國家，可見中國國產手錶嘅實力，不容小覷。
孫大為：國產機芯近年受歐洲青睞
香港鐘表業總會顧問孫大為就指，中國製錶工業過去以價格取勝，但後來發現利潤太薄，難以撥出資源以研發新技術，於是約三至五年前，業界改變策略，將競爭焦點由價格轉移至比併技術同檔次，令到國產手錶質素大為提升，而中國製機芯，近年亦為德法等歐洲手錶品牌所採用。國貨公司負責人余偉傑，佢就覺得，中美俄既是同屬太空科技大國，大家攜手合作先至係造福人類之道。
至於香港青年工業家協會執委沈慧林就認為，中國過去就有擅長精巧工藝嘅傳統，對於同樣講求精密嘅製錶業，亦好容易駕輕就熟。雖然現今仍有唔少人對中國貨懷有粗製濫造嘅成見，但佢相信假以時日，識貨之人都會懂得國產手錶嘅優秀之處。
卓妮