政情：黃傑龍無限量零食 慰勞加班下屬
唔少公司都會提供員工福利，好似醫療津貼、生日假期等，有啲更會提供無限量零食，好似稻苗學會會長黃傑龍（Simon）都有咁做，仲要一箱一箱送到公司，場面好墟冚！Simon話，已經實行提供零食近五年，因為見到同事久唔久就要加班工作，特別係每逢月尾時會計部要埋數、人事部又要出糧，所以慰勞下屬加班，但就要定期填倉，因為常滿好啲喎。
Simon又將一箱箱零食相片上載到Facebook，健康嘅有餅乾，香口嘅就有薯片，就連充飢嘅杯麵都有，真係唔怕會餓親，難怪網友大嘆想公司都有咁嘅福利。網友羨慕呢項福利，咁公司員工又鍾唔鍾意呢？Simon話見過有同事連早餐都以零食代替，睇嚟佢所買嘅好啱食。
話怕熱氣 自己好少食
零食受到同事熱捧，但Simon就話自己怕熱氣而甚少食，但食杯麵嘅次數就稍為多啲，主因係預計當晚好夜先有飯食就會以杯麵打底，絕對唔會因為口痕去食喎。