政情：張秀賢被聯署反「暴大」
近月反對修訂《逃犯條例》搞到滿城風雨，無論持乜嘢政見同立場嘅都有發起聯署。近日就有班中文大學校友聯署，批評近日中大學生支持罷課、豎立雕像係鼓吹暴力，但喺聯署名單中，就出現咗中大學生會前會長張秀賢個名。明明喺星期一嘅罷課集會上，張秀賢仲有發言支持，但事隔兩日就聯署反對，乜嘢驅使佢轉軚轉得咁快呢？
仲記得張秀賢喺中大罷課集會上，仲講過中大被稱為「暴大」係因為一直以來抗爭前線都有中大學生的身影，點解會簽反暴聯署？佢尋日喺Facebook上載咗份中大校友聯署，話有人喺聯署上見到佢個名，佢隨即利益申報，話簽名嗰個人唔係佢，仲話可能聯署嗰位「張秀賢」係女人添！
原來係同名同姓嘅師姐
張秀賢回應查詢時，話其實聯署嗰個唔係佢嚟，而係一位同樣都叫「張秀賢」嘅師姐嚟。佢仲話睇到嗰時都以為自己精神分裂咗，因為一邊撐罷課，一邊就聯署反對。至於被聯署，佢就話尊重師姐嘅聯署自由，仲叫大家唔好認錯人。其實香港有成七百萬人，好多時都出現同名同姓，被認錯都唔出奇嘅！