政情：林健鋒返母校 同師弟傾出火花
呢排有好多中學都罷課，行政會議成員兼立法會議員林健鋒前日都返咗母校聖若瑟書院，唔通係去支持師弟罷課？原來係母校請咗佢返去同師弟傾吓偈，分享一下從商經驗，佢仲話傾到有好多火花添，話師弟對政府點處理土地問題有好多意見，究竟係乜嘢呢？
林健鋒曾經做過舊生會主席，所以一直都有同母校保持聯絡。今次返去嘅一班師弟都係舊生，有老有嫩，有啲啱啱入大學，而佢就係年紀最大嘅。佢話大家傾咗好多議題，當中有唔少火花，但佢強調大家都好和平理性。
鬧爆政府有地唔用
咁究竟擦出乜嘢火花？佢話啲師弟覺得明明香港唔係無地，有大把棕地、農地，點解咁少地起樓畀人住。政府仲可以填海添，方法有好多，但政府就只會按本子辦事。佢哋希望政府可以跳出框框思考，同埋唔好搵啲既得利益者喺房屋事務話事。
樓價咁高，好多年輕人都好難買樓，林健鋒話有師弟已經放棄住貴私樓，覺得住公屋都得。佢話政府可以搞多啲公屋重建，將啲本身得幾層嘅舊公屋改成三、四十層，咪可以住多啲人囉！