政情：陳健波引譚校長金曲 慨嘆誰可改變
持續咗近三個月嘅反修例遊行集會，令社會嚴重撕裂。立法會保險界議員陳健波（波哥）拍咗段短片，仲用咗譚詠麟（譚校長）嘅經典金曲《誰可改變》嘅歌詞，話若要令香港回復理性、和平同包容嘅日子，首先各級政府官員同老師都有責任改變自己。
稱官員同老師都有責任
喺短片中，波哥一開始就讀出「將光陰倒轉，再讓往日，復現眼前」幾句歌詞，寓意點樣返番去昔日穩定嘅日子？佢話政府官員比大部分人好好彩，因為佢哋係鐵飯碗、薪高糧準，但亦都有責任管治好同做好政府工作，特別係高薪厚祿嘅高官更加要「的起心肝」，有心有力，唔怕承擔，將香港各種問題當正係自己屋企問題解決，市民怨氣自然會減少。
唔單止政府官員要改變，佢話老師都要改變，事關老師嘅言行好影響學生，作為一位負責任嘅老師，唔應該幫學生洗腦，將自己嘅諗法硬加喺學生身上，反而要擴闊學生嘅視野，提升思考質素，包括有多角度分析，學生得到知識後畀佢哋有個人選擇。
臨尾佢話日後香港將交託喺年輕人手上，但見到最近有十幾歲嘅學生被捕，身上被搜獲武器同汽油彈，反問究竟係邊個將年輕人推向剃刀邊緣，咁樣大家點會唔痛心、擔心、憂心同傷心呢？唔知道關心香港嘅你，聽完佢咁講又會唔會有共鳴呢？