政情：遊行拖累演藝文化活動 馬逢國盼政府出地補搞
受到反修例示威浪潮嘅衝擊，各行各業都受到重創，就連一啲演藝同文化活動都要取消或者延期。身為立法會體育、演藝、文化及出版界議員嘅馬逢國當然要救亡喇！佢依家仲搞問卷調查，研究吓示威活動對本地業界嘅影響，希望政府可以幫幫手，就算賠唔番錢，都搵番個場地畀人哋補辦啊嘛！
稱每個行業都應做調查
馬逢國話示威活動已持續咗好耐，而佢亦收到有業界嘅一啲機構反映有活動要取消或延期，但確實幾多就唔知，因為好似旅遊業餐飲業嗰啲受影響嘅情況好明顯，但演藝文化業有乜嘢損失真係無人知，所以佢前幾日喺Facebook公布咗份問卷，希望了解業界受到嘅影響有幾大，為期一個月，到九月三十日就結束，佢仲話每個行業都應該搞番個問卷喎。
究竟政府可以點幫手？佢話政府可以喺場地安排方面着手，例如畀番啲檔期業界補搞番啲活動。其實呢示威造成嘅破壞唔係淨係嗰幾個政府高官要負責，係成個政府各個部門都要出嚟幫手解決問題，好似演藝文化及體育界就係屬於民政事務局嘅範疇，局長劉江華聽唔聽到呀？