話唔好將冷氣校到太凍
其實秘書處周不時都會出啲環保小貼士畀議員，呼籲一下大家節能，今次嘅小貼士就提到，雖然就嚟中秋，但香港九月份嘅天氣仍然好熱，不過都唔好將冷氣校到太凍，二十五點五度就啱啱好。
如果仲係覺得熱嘅話，點算好呢？秘書處就提提你，可以將百葉簾拉落嚟，等啲陽光唔好直射入室內，可以減少冷氣機負擔咁話，之但係睇真啲，呢份小貼士又叫人減少使用電燈，改為善用日光照明，咁應該開簾定落簾呀？好亂呀！
講真嗰句，其實立法會十月都唔知能否復會，開唔到會，自然連議員辦公室都少咗人返去，能源都用少啲，咁仲唔係最節能同最環保嘅方法？