中環出更：示威不絕 蕭偉強：勿幫別有用心嘅人提供彈藥

蕭偉強喺貼文中開首，就話對七月二十一日白衣人喺西鐵元朗站襲擊市民感到好憤怒，為警方喺港鐵站內無差別使用武力感到好反感，同時亦應該要為部分激進示威人士無差別嘅破壞衝擊感到十分痛心，佢強調對任何一方嘅暴力都應該拒絕，唔能夠有雙重標準，唔能夠盲撐。

智仁制約勇武

對於八月三十一日同九月一日爆發嘅激烈衝突，佢話示威人士持續升級嘅破壞同暴力，係咪能夠吸取教訓，以智仁制約勇武，免墮入暴力陷阱，為一些別有用心、樂見玉石俱焚嘅人提供彈藥！？

佢話追求公義去改革社會嘅路一向都係好漫長，而反修例運動已令在位者唔能夠唔深刻咁去反省同正視問題，而佢亦一直提醒唔應該用唔公義嘅手法爭取公義，因為咁樣不單止會唔自覺同不停降低道德標準，亦都會偏離咗初心，為侵害其他人嘅行為搵藉口，並再次呼籲示威者「停一停，諗一諗」，唔好再犧牲自己。

卓妮