中環出更：當囝女咁錫 王嘉恩愛犬離世後不再養狗
好多人都會當家中寵物係子女一樣咁愛錫，好似香港國術總會創會會長王嘉恩，佢早前出席香港菁英會與香港國術總會舉辦慈善放映會時，講起某年生日收到嘅禮物係一隻只得兩、三個月大嘅玩賞犬「摩天使」，完全當佢係家庭成員之一，但四年前狗狗都係走到生命盡頭，以十五歲高齡離世，佢同太太都非常難過，至今都再無養狗嘅打算。
王嘉恩講起，當年為咗做好狗主嘅角色，努力搜羅養狗嘅知識，不時同太太購買狗狗嘅衣着，又餵以新鮮有機食材，以及專程去容許寵物入內嘅商場添。同呢隻狗仔相處咗咁多年，難怪佢會咁傷心啦。
李曠怡結婚後 被迫要同貓狗分居
當日嘅慈善放映會，其實係播映一齣講述導盲犬嘅電影，好多嘉賓都曾經同狗狗相處過。好多人都有一種印象，以為貓同狗唔可以共處。不過菁英會會員事務委員會副主任李曠怡就話，「喵星人」同「汪星人」，其實都好老友，分別只係後者必須每日落街散步，前者就非常「深閨」。即將結束王老五生涯嘅李曠怡話，未婚妻對貓狗嘅毛毛敏感，婚後無奈要同陪伴佢多年嘅「喵星人」同「汪星人」分居，所幸父母都喜歡寵物，會繼續幫佢照顧一對貓狗咁話。咁去探小動物都好方便啫！
轉個頭又見到菁英會主席曾鳳珠，佢話，近日同佢囝囝加入「貓奴」行列，原來佢有次同囝囝喺跑步徑附近，發現幾隻貓BB，雖然通知愛護動物協會處理，但係囝囝央求下，佢都領養其中兩隻小貓，但同時亦要囝囝承諾好好照顧生命，負責清理貓貓嘅排泄物，同埋不再沉迷打機。睇嚟養小動物都係育兒秘方喎！
卓妮