中環出更：議員反應冷淡 立會訪珀斯去唔成

下周芬蘭外訪亦三人退團

立法會早前收到英國英聯邦議會聯合會邀請參加一個工作坊，呢個工作坊與打擊販運人口活動有關，有資格參加工作坊嘅議員必須曾經參與過販運人口活動、現代奴隸制項目，而且名額只得兩個，絕對唔係想去就有得去。翻查資料，立法會紡織及製衣界議員鍾國斌喺今年三月底就參加過相關嘅研討會，預計係合資格嘅議員之一。

保安事務委員會早前就工作坊事宜諮詢過議員，而尋日就有結果，一共有十八名議員提出意見同回應，當中十七人同意，一人無意見。不過，今次係用傳閱文件方式交畀委員會研究，根據規矩要有過半數嘅委員會委員批准，而且又無人反對或要求討論，先可以批准。而保安事務委員會一共有四十一名委員，今次收得十八個回覆明顯未過半數，所以唔再跟進呢件事囉。

講開又講，近日議員對於立法會嘅外訪團，反應變得比較冷淡，例如教育事務委員會下星期去芬蘭外訪，就有三人決定退團，當中有議員明言因為香港情況而決定留守，睇嚟社會氣氛真係會影響到議員行事喎。

卓妮