中環出更：張宇人慨嘆月餅銷情災難式挫四成
臨近中秋節，應該係月餅至為暢銷嘅時候，但礙於街頭抗爭不斷，零售市道不景之餘，月餅嘅銷情亦受到拖累。立法會飲食界議員張宇人日前出席肇慶海外聯誼會嘅理事會就職晚會時，話今年月餅嘅銷路同過往同期比較，銳挫三至四成，跌幅之大可謂歷年罕見，可以用災難嚟形容咁話。
張宇人話喺六月爆發連串衝突事件，飲食業嘅生意額大跌，又慨嘆香港依家「立立亂」，大大抵銷佳節氣氛，市民嘅消費意欲不振，自然亦無心情預備中秋禮品喇！
麥家榮籲政治爭拗勿擺上餐枱
本身係律師嘅肇慶海外聯誼會副主席麥家榮亦有經營意大利餐廳，佢都話近兩個多月嚟，餐廳生意確實係淡咗，只能夠希望困難盡快過去。對於有網民呼籲抵制政見不合嘅餐廳食肆，佢認為做法唔係咁好，事關經營飲食業都相當重視食物水準同口碑，然而人言可畏，所以佢同餐廳同事都避免表達政見。佢又話食得開懷最緊要，與其將政治爭拗帶到餐枱上面，不如好好咁品嘗美酒佳餚，畢竟餐廳食肆並唔適合做論政嘅場地。
卓妮又見到樂善堂主席楊小玲同香港中華廠商聯合會會董鄧錦添。楊小玲話儘管市面嘅月餅種類好多，但佢用嚟送禮嘅月餅，來來去去都只係奶黃月餅，原因係樂善堂嘅慈善月餅就係選用奶黃為餡料。雖然佢好欣賞新派月餅嘅創新精神，不過佢都好喜歡食傳統月餅，尤其係年輕人眼中視為冷門嘅五仁月餅。點解？佢話五仁月餅嘅餡料以果仁為主，咬落去唔單止口感十足，仲較一般嘅蛋黃蓮蓉月餅來得健康。
卓妮