政情：陳沛然波衫驚恐症 紅黃藍白黑 着乜色都死
近期反修例示威衝突愈演愈烈，好多市民都好擔心自己嘅人身安全，甚至連着咩色衫出街都要諗過度過先。立法會醫學界議員陳沛然（Pierre)都有呢個煩惱，佢話望住屋企嗰十幾件波衫好迷惘，因為佢唔知着邊件好！唔通佢有選擇困難症？
Pierre出晒名係波牛，自稱正職係足球員，興趣係做醫生。唔好睇佢成日講笑，其實佢都好認真對待醫生呢個專業。就好似係最近示威活動佢都有出去幫手做人道救援，差唔多晚晚都走上街頭拯救傷者，幫人急救，成個戰地醫生咁。佢仲會喺Facebook度報平安，會加多句話買埋消夜返去食，等啲網友唔使咁擔心。
由於佢經常四出同朋友踢波，所以佢儲埋好多件波衫。佢話呢啲波衫都係過去二十年嚟，同十班唔同嘅朋友踢波，而每隔幾年會再做球隊波衫，參加唔同比賽，又話波衫唔係名牌唔貴，但勝在有感情嘛！
日前佢就喺Facebook貼文，好感慨咁話：「世界本來應該是彩色的，以及多姿多采的。」乜嘢令佢望住啲七彩繽紛嘅波衫咁愁呢？佢話有五隻色唔敢着。究竟係邊五隻色令佢咁驚呢？佢話依家佢唔敢着紅、黃、藍、白、黑嘅波衫，驚夜晚喺橫街窄巷行會有危險。
網友教路：粉紅或彩虹色
咁又係呀！事關依家着乜嘢顏色嘅衫就標籤你係邊類人，例如紅色代表五星旗、黃色就係當年違法佔領行動（佔中）代表色，藍色就係支持政府同撐警，白色同黑色相信唔使講，分別代表721西鐵元朗站嗰班白衫人同反修例示威者。真係着乜都死，點算好呢？
有網友分享，同Pierre有同樣嘅煩惱，話佢喺831當日有足球比賽，下晝喺港島，而佢隊波係黑色衫，問Pierre佢應該點樣偷運件衫去比賽喎。亦有網友話如果畀啲攞槍、攞棍嘅不明分子要求搜袋又點算？點解釋好？係咪要賽會出個證明話佢真係去參賽定點呀？Pierre就未有回覆。
既然連顏色都咁難揀，有網友幫Pierre揀。着乜嘢色？叫佢着粉紅色或者彩虹色喎。唔知佢點諗呢？