中環出更：彭徐美雲：學校重德育不應有欺凌
今日係開學日，耀能協會主席彭徐美雲尋日出席一個公開場合時話，儘管兒子Victor早就學有所成，但往日迎接開課日嘅情景，如今仍歷歷在目，話每逢新學年都要面對嘅任務就係幫囝囝買教科書，但教科書總係好難一次過全部買齊，家長必須頻撲好幾次，先至集齊開學所需課本，其次就係細路仔大得快，要趁開學前買套新校服，囝囝着得醒目有型，返到學校先至唔怕失禮。
彭太話自己嘅媽咪身為外婆亦會用另類方法去迎接開學日，就係為孫仔準備一棵葱、芹菜同一封利是，寓意聰明伶俐，同勤於學習。至於好多學生都遇過嘅校園欺凌，彭太話好彩從未遇過，但佢都有聽聞，有警察擔心其子女於開課之後遭同學清算嘅消息，佢認為學校若果容許歧視同欺凌，就會同培養學生德智體群美嘅教育理念相違背，況且小朋友返學讀書，同佢哋父母喺社會嘅工作無關，文明社會唔應該有「株連」呢種情況出現。
容許歧視 違背教學理念
同場嘅香港工商總會主席王庭聰話若果學生遭到欺凌，原因竟然涉及父母職業的話，情況就更為惡劣，亦更令人憂慮，佢認為騷擾同學就如同毀壞公共設施，都係損人不利己嘅行為，既唔文明亦唔理智。
對於廠商名譽會長會顏吳餘英嚟講，開課日已經係上個月中嘅事，因為佢嘅孫仔就讀國際學校。佢又話現今嘅學生屬於網絡世代，就算老師唔講，亦會從網絡中得悉時事同政治議題，繼而喺同學間互相討論，相較過去網絡未普及嘅時代，舊時嘅學生就顯得相當單純啦！
卓妮