政情：公民講場：措施諗咗當做咗 陳帆起鐵路一味拖

政府好多政策講完都未必實行到，以運輸及房屋局嘅情況最嚴重，好似公屋三年上樓嘅目標又做唔到，建屋目標又完成唔到，不過原來鐵路項目都有走數，好似原定二○二○年至二○二四年落實嘅「東涌西站」至今都係只聞樓梯響，搞到有東涌區議員鬧爆運房局規劃失當，仲去埋申訴專員公署投訴，狠批計劃最早可以追溯到二○○一年逸東邨入伙時，但至今連動工消息都未有，換言之即係近廿年都一直走數。查實運輸及房屋局局長陳帆有不少交通同房屋計劃，都係講嘅時候就有好厲害嘅願景，但做出嚟又走晒樣，唔通陳帆以為諗咗就當做咗，可以改善到民生？