政情：今日你上鏡：陸頌雄戴頭盔眼罩爭取串連單車徑

近日唔少暴力衝突，都有示威者戴頭盔眼罩希望政府回應訴求，立法會議員陸頌雄最近都喺社交網站上載短片，同樣戴住頭盔眼罩要爭取啲嘢，不過，佢就同近日衝突嘅示威者所爭取嘅唔太相同嘞。其實佢身兼元朗區議員，一向爭取單車徑唔好「斷橛禾蟲」咁，未能連貫各路段，逼踩單車嘅人士幾十米就落車。佢喺短片入面自稱係特派社區勤務員，戴裝備嗰陣煞有介事，背景音樂仲用咗星球大戰嘅音樂，唔知以為佢想扮超人變身添，其實佢只係想表達自己係單車發燒友啫！佢話經過多年爭取後，當局已經開始陸續改善緊相關嘅設計喎！