政情：黎穎瑜買樓非純睇升值潛力
對於香港後市點睇，真係身體最誠實，所以大家不時都好關注問責官員嘅置業情況。民政事務局局長政治助理黎穎瑜，上月被揭增持一個九龍城嘅住宅單位作出租用途，唔通對後市好有信心？一問之下，佢就即刻話有信心，置業都係為咗支持香港，至於所謂有信心，並非純粹睇升值潛力喎！咁仲可以睇咩呢？
先出租 遲啲自己住番
黎穎瑜話，對後市有信心外，亦覺得香港係屋企，對於留港有信心，既然係屋企，就要有個家，有得住喺度至得，所以之前賣咗個單位後，都仲係想買番個，長遠都係想用嚟自住咁話。唔知其他無香港物業嘅問責官員，係咪對香港冇乜信心，所以才不置業呢？
講起自住，根據申報，黎穎瑜呢個單位依家係出租緊(口架)喎，佢就解釋，之前賣樓後都有租屋住，依家租約未完，又買咗呢個新單位，惟有都係租出去先，遲啲都諗住自己住番。