政情：法國太熱 黃家和酒莊遲收成
如果話法國其中一樣特產係紅酒，相信無乜人會反對，香港中華廠商聯合會副會長黃家和（Simon）最近喺社交網站上載咗幾張相，見到佢似乎又去咗法國玩。
佢回覆指，近日同幾個朋友飛去當地玩足一個星期，行程包括去佢喺貝爾熱拉克嘅酒莊，順便睇吓葡萄嘅收成同埋紅酒嘅產量，因為法國太熱，搞到佢啲葡萄都要遲啲先收成添！
依家已經接近暑假尾聲，Simon話，法國天氣非常熱，早幾日高達三十八度，搞到酒莊葡萄生長都慢咗，之前估計九月中就可以摘，但今年要去到九月尾先得，不過，細酒莊今年有二萬支紅酒出產，大酒莊就有成十二萬支，所以佢對產量都幾滿意。其實今次並非首次受天氣影響，佢話，對上兩次大豐收已經係二○一五、一六年時，去年受到天氣影響，整個波爾多區嘅紅酒產量都少咗。
帶朋友去食海鮮睇文物
咁遠去到法國，目標當然唔止紅酒咁少，Simon話當地近大西洋海岸地區嘅生蠔都好出名，所以專程帶朋友去食海鮮，啲生蠔特別甜美。佢仲去咗遊覽法國嘅歷史文物、中世紀古建築物，大讚法國係一個好好嘅旅遊景點喎！