政情：凌嘉勤掌郊園委員會 起樓隨時凍過水

發展郊野公園一向都係極具爭議嘅議題，單係環保團體同保育人士所施予嘅壓力已經非常龐大，不過香港多年嚟都面對房屋問題，樓價高又唔夠地建屋，所以幾年前政府已謀住發展郊野公園，但呢個建議明顯係燙手山芋，就連當年身為規劃署署長嘅凌嘉勤都曾經開腔表明，現階段無需要發展郊野公園用地。

曾稱毋須發展 立場無變

之後發展郊野公園一事，一直都未有實際行動，而凌嘉勤亦喺約三年前退休，不過佢尋日就獲政府委任為郊野公園及海岸公園委員會主席，任期由明日開始，為期兩年。呢個委員會負責考慮郊野公園、海岸公園等嘅政策同計劃，並向郊野公園及海岸公園管理局總監提供意見。不過佢過去明確反對發展郊野公園，到底政府係揀無可揀先搵佢，定真係唔想發展郊野公園呢？

凌嘉勤接受查詢時話，其反對發展郊野公園嘅睇法一直冇變，立場好公開同清晰，重申今次角色被動，覺得幫到手就接受政府委任，估計係因其城市規劃經驗先獲政府睇中。

佢又補充，自己一向係支持大規模改造棕地並發展成新市鎮，同埋喺維港以外大規劃填海，現時政府都朝呢兩個方向工作，好似古洞北新發展區、「明日大嶼」等計劃，強調要兩者並行先可以解決到香港土地問題，至於政府係咪因為佢反對發展郊野公園而作出任命，佢就話唔知道喇。

講真嗰句，大家都記得，港大榮休教授周永新完成退休保障研究後，政府唔肯推行，亦都記得土地供應專責小組做完諮詢後，政府又硬推「明日大嶼」，依家真係惟有祝福凌嘉勤未來兩年畀嘅意見，政府會肯聽啦。

身兼房協副主席一職

講開又講，現屆政府有唔少前官員，重出江湖擔任公職，好似凌嘉勤現時都孭房協副主席一職，亦獲政府委任為數碼港董事，而其他例子就有公務員事務局前局長張雲正、財經事務及庫務局前局長陳家強等，政府唔係鬧人才荒都無人信喇！