中環出更：鐘錶業研搬廠 蔡宗富：要留意供應鏈
貿易戰加上近日嘅社運抗爭，好多行業都要艱苦經營，鐘錶業都要諗計走出困局。日前貿發局宣布，每年一度嘅鐘錶展將於下周二舉行，貿發局副總裁周啟良就呼籲廠家不妨將目光投向於新興市場，不過，香港鐘表業總會副主席蔡宗富就話，鐘錶涉及專業分工，提醒若搬廠避稅，要考慮供應鏈嘅問題咁話。
周啟良話，兩個多月來嘅示威同警民衝突，對鐘錶展嘅影響只屬輕微，貿易戰對鐘錶業嘅出口影響相對較大，今年頭七個月嘅總出口量，同舊年同期相比錄得輕微跌幅。佢講起內地同亞洲地區都已經成為重要嘅鐘錶消費市場，香港好多廠家近年積極發展菲律賓、印尼同泰國等地嘅市場，都有唔錯嘅成績添！聽落真係殺出條血路。
雖然新興市場予人無限憧憬，不過蔡宗富就認為，好多新興市場嘅國家，無論採購量同零售系統，都遠不如美國呢個傳統市場，儘管內地對鐘錶嘅需求好大，但同美國相比仍有距離。至於廠商有冇打算將生產基地遷往其他國家，以避免貿易戰所加徵嘅稅額？蔡宗富就話難度好高，鐘錶生產涉及錶帶、機芯同表面處理等專業分工，一旦搬廠，就要考慮供應鏈嘅問題，例如佢早前考察泰國，就發覺當地鐘錶生產供應鏈未有基礎。
程思遠：工序回流 年輕人新出路
正所謂有危就有機，貿易戰雖令鐘錶業大吹淡風，但亦可能係香港再工業化嘅契機。有份出席貿發局記者會嘅本地製錶工房負責人程思遠話，過去香港製錶工業北移，但喺貿易戰影響下，開始有人將製錶工序回流香港，雖然係以小型製錶工房居多，但就可以為有志投身行業嘅年輕人提供另一條出路。香港鐘表業總會當年顧問孫大豪就認為，鐘錶業重回香港設廠，亦難以做到大批量生產，但若鐘錶製作步向客製化都係可行嘅方向。
卓妮