中環出更：高潔梅話當年 搞傷健營出動登陸艇
傷殘人士喺日常生活中，往往要面對好多困難。香港傷健協會總幹事高潔梅（Samantha）尋日出席協會一個宣傳活動時就講起，喺一九七○年時，協會喺烏溪沙搞傷健營，當年啲船嘅設施冇依家咁好，令到坐輪椅嘅人士好難上到船，最終要借架登陸艇送傷殘人士去。真係聽見都覺得艱難！
Samantha話香港依家嘅無障礙設施相比幾十年前已經增加咗，當年搞傷健營係想傷殘人士同健全人士可以交流下，但要去烏溪沙就要由馬料水站坐船，因為登陸艇有斜落嚟嘅平台，輪椅嘅會員就可以上到船，嗰次傷健營都籌備咗逾半年，當年真係完全冇傷健共融嘅概念，搞完嗰次活動後，就成立咗依家呢個協會。
香港傷健協會董事陳寶珠就話早年試過同國內嘅傷殘組織一齊喺內地搞活動，有約一百人參與，但場地嘅設備都令輪椅難以進入，要逐個抱入場地內，好彩嗰次有一大班義工幫手，兩個義工照顧一個傷殘人士，先搞得掂咋！
殘疾人士講述出行困難
其實協會正舉辦一個叫「他視點」嘅計劃，希望以展覽同攝影比賽等，宣傳傷健共融嘅精神，活動亦有幾位傷殘人士出席，包括患有大腦麻痹症、要坐輪椅嘅黃少川，佢講起自己出行不時都遇到困難，例如巴士只有一個輪椅位，如果已經有輪椅人士上咗車，佢就要等下一班車，上港鐵又需要職員協助才能入車廂，所以不時都會遲到。佢又話有時喺環境擠迫嘅街市同港鐵都會遇到尷尬情況，因為自己坐輪椅，好多時都係望到其他人嘅腰間。
今次活動有唔少特別嘅插畫，表達傷殘人士平日遇到嘅困難，原來係搵咗漫畫家利志達幫手畫插圖，利志達就話今次係希望做吓啲有意義嘅事，講笑話唔係成日都做喎，希望大家會多啲企喺他人嘅角度諗吓咁話。
卓妮