政情：社會立立亂 施榮懷董吳玲玲歎茶減壓
最近香港人心情都好沉重，早兩日香港中華廠商聯合會永遠名譽會長施榮懷（Irons）同善德基金會主席董吳玲玲就相約傾吓偈，睇吓可以做啲乜嘢令到社會氣氛好啲、大家開心啲。Irons難得喺百忙之中抽空到董太嘅寫字樓飲茶傾偈，佢哋都笑笑口話飲咗茶，個心都舒暢啲咁話。
施享受品茶平靜氣場
Irons話最近社會立立亂，佢都叫朋友睇少啲手機，得閒飲吓茶、吹吓水好過。佢謙稱自己唔識茶，冇特別鑽研，但係好鍾意品茶時嗰種平靜同平和嘅氣場。
董太都話近幾月大家心情比較低落，佢同Irons分享咗一啲睇法，希望可以做啲事，增加社會正能量。Irons一場來到，兩人又都係福建人，董太梗要好好招呼，請Irons歎自家茶山出品的靚普洱。董太自細就開始飲茶，所以好喜歡茶，玩茶都玩咗好多年，早幾年更加因慈善結緣而獲得非常珍貴嘅原生態古樹茶。所以當日兩人一邊淺嘗靚普洱茶，一邊傾偈，心情自然舒暢晒。